Jarene

Aku iki wong wadon
Ana sing nyebut aku iki wanita 
Uga ana sing nyebut aku iki putri, wong putri

Jarene

Wong wadon kudu pinter nutupi wadi, aib
Wong wadon kudu pinter nutupi samubarang sing rahasia
Samubarang wadi, aib lan rahasia kudu pinter nutupi
Nutup, ditutup
Pet, rapet

Jarene 

Dadi wong wadon kok ora primpen nyimpen wadi
Dadi ngisin-ngisini
Aku bakal dadi wong wadon sing kurang aji

Jarene

Aku iki wanita 
Ana sing nyebut wani ditata
Sing ndadekake wanita dadi abdine wong priya
Wanita, manuta
Swarga nunut, neraka katut 
Wanita, manuta
Macak, manak, masak 
Kasur, dapur, sumur 

Wanita
Jarene
Wani ditata (?)
Apa wani ing tata (?)
Apa wani tapa (?)

Malah jarene
Wanita kuwi wanitombok
Wani tombok anak bojo
Wani tombok utange bojo
Wani (?) ta (?) mbok (?)

Jarene
Aku iki putri, mruput katri 
Ndisikke lan ngutamakke telung perkara
Aku kudu gemi
Kudu nastiti
Lan kudu ngati-ati

Hah
Kesel aku manut jarene

Jarene
Wong wadon
Dadi wanita
Dadi putri
Kudu ayu

"tak lela, lela, lela ledhung. cup meneng anakku cah ayu"

Ayu (?)
Sing ndi (?)
Sing kepiye (?)

Ayu rupa (?)
Ayu bandha (?)

Peh, cilaka mencit aku dadi wong wadon sing ora ayu rupa ora ayu bandha
Aku kudu siap ora payu merga ora ayu

Eh, jarene
Ayu kuwi dudu ayu rupa, dudu ayu bandha
Nanging ayuning ati, manah lan rasa

Ayu
Hayu
Rahayu

Jarene